Директорлар кеңесінің 2025 жылы атқарған жұмысы

2025 жылы ҚМГ Директорлар кеңесі 23 отырыс өткізіп, олардың барысында 254 мәселе қаралды.

Есепті кезеңде ҚМГ Директорлар кеңесі қаржылық тұрақтылықты қамтамасыз ету, инвестициялық жобаларды басқару, тұрақты даму, ішкі аудит пен тәуекелдерді басқару мәселелеріне, менеджменттің негізгі тиімділік көрсеткіштерін әзірлеуге, сондай‑ақ қызметкерлердің қауіпсіздігі мен әл‑ ауқатын қамтамасыз етуге ерекше назар аударды.

2025 жылы ҚМГ Директорлар кеңесі негізгі тәуекелдер туралы ақпаратты тұрақты түрде алып отырды, олардың Компания стратегиясы мен бизнес‑жоспарларына ықпалын талдап, тиісті шаралар қабылдады. Сонымен қатар Директорлар кеңесі тәуекелдерді басқару және ішкі бақылау жүйесінің өзі айқындаған қағидаттар мен тәсілдерге сәйкес ұйымдастырылғанына және оның қойылған міндеттерге сай тиімді жұмыс істейтініне көз жеткізіп отырды.

Комитеттер бөлінісінде:

• Директорлар кеңесінің Тағайындау және сыйақы жөніндегі комитеті (ТжСК) – 16 отырыс, 100 мәселе;
• Директорлар кеңесінің Стратегия және портфельді басқару жөніндегі комитеті (СПБК) – 12 отырыс, 122 мәселе;
• Директорлар кеңесінің Қауіпсіздік, еңбекті қорғау, қоршаған орта және тұрақты даму жөніндегі комитеті (ҚЕҚҚОҚ және ТДК) – 9 отырыс, 61 мәселе;
• Директорлар кеңесінің Аудит жөніндегі комитеті (АК) – 19 отырыс, 168 мәселе.

Есепті жыл ішінде ҚМГ Директорлар кеңесінің қарауына ҚМГ қызметінің аса маңызды проблемаларына байланысты мәселелер шығарылды. ҚМГ Директорлар кеңесінің отырыстарында қаралған осындай проблемалардың қатарына: санкциялық тәуекелдер (атап айтқанда, «Қаламқас‑теңіз – Хазар» жобасына қатысты), өндірістік жарақат алу тәуекелдері (оның ішінде «Өзенмұнайгаз» АҚ‑дағы жағдай), ірі инвестициялық жобалардың («ПМХЗ» ЖШС) құнын ұлғайту және мерзімдерін бұзу тәуекелдері кірді, сондай‑АҚ KMG International N. V.‑ге салық талаптарына байланысты мәселелер 2025 жылы ҚМГ Директорлар кеңесі барлығы 254 мәселені қарады, оның басым бөлігі (шамамен 10‑15) аталған маңызды мәселелер бойынша шешімдерді іздеу мен талдауға тікелей арналды.

2025 жылғы стратегиялық сессия

2025 жылғы 2 шілдеде ҚМГ Директорлар кеңесінің кесте бойынша жоспарланған отырысы өткізілді. ҚМГ Директорлар кеңесінің бұл отырысы ҚМГ Директорлар кеңесінің, ҚМГ Басқармасының төрағасы мен мүшелерінің, сондай‑ақ энергетикалық нарықтар мен стратегиялық консалтинг саласындағы шақырылған сыртқы халықаралық сарапшылардың қатысуымен өткізілді.

Сессияда қаралған басты бағыттар мен тақырыптар:

1. Сыртқы орта мен жаһандық трендтерді талдау. Негізгі баяндамаларды шақырылған сарапшылар – «S&P Global Commodity Insights» компаниясының «Upstream Energy» тобының вице‑президенті және бас стратегі Боб Фриклунд және «Rystad Energy» компаниясының Лондон кеңсесінің директоры Саймон Шьотун баяндады. Пікірталас барысында геосаяси жағдайдың әлемдік энергетикалық нарықтарға әсері, мұнай мен газға сұраныс пен бағаның болжамдары, капиталды бөлу және декарбонизация саласындағы жетекші әлемдік мұнай‑газ компанияларының стратегиялары, сондай‑ақ саланы трансформациялаудағы жасанды интеллектінің рөлі мен әлеуеті мәселелері қаралды.
2. Қолданыстағы Стратегияның өзектілігі. ҚМГ Директорлар кеңесінің мүшелері мен менеджменті мұнай‑газ‑химия бизнесіне кіруді, газ тасымалдау активін бөлуді, сондай‑ақ энергетикалық ауысуға жаһандық трендті қоса алғанда, 2021 жылдан бері орын алған сыртқы және ішкі ортадағы өзгерістер контексінде компанияның ағымдағы стратегиялық бағытына жан‑жақты талдау жүргізді.
3. Стратегияны басты бағыттар бойынша іске асырудың жай‑күйі:

• Ірі мұнай‑газ жобалары: «Теңіз», «Қашаған» және «Қарашығанақ» кен орындарындағы жобалардың ағымдағы жай‑күйі мен перспективалары егжей‑тегжейлі қаралды.
• Мұнай‑газ химиясы: «Полиэтилен», «Газ сепарациялау кешені», «Карбамид» және «Полиэтилентерефталат» жобаларының іске асырылу барысы туралы ақпарат тыңдалды. EPC‑келісімшарттар жасасу мерзімдеріне, стратегиялық серіктестерді тартуға және Қазақстанда полимерлік өнімдерді өткізу нарығын дамытуға ерекше назар аударылды.
• Қаржылық тұрақтылық: компанияның борыштық жүктемесінің динамикасы және алдағы ауқымды инвестициялық бағдарлама контекстіндегі «таза қарыз / EBITDA» коэффициентінің болжамды мәндері талданды.
• Цифрландыру және жасанды интеллект: өндірісті оңтайландыру («Су айдау тәсілін басқару»), жабдықты болжамды талдау, қауіпсіздікті бақылау («TUMAR» автоматтандырылған интеллектуалды жүйесі) және бизнес‑процестердің тиімділігін арттыру (ЖИ‑ассистенттер) жүйелерін қоса алғанда, жасанды интеллект технологияларын енгізу бойынша жобалар портфелі ұсынылған.

Сессия қорытындысы бойынша әзірленген негізгі ұсынымдар мен шешімдер:

1. Стратегияның өзектілігі расталды.
2. ҚМГ менеджментіне:

• компанияның қаржылық тұрақтылығын бақылауды күшейту бойынша;
• жасанды интеллект саласындағы ынтымақтастықты дамыту бойынша;
• мұнай‑газ‑химиясы жобалары бойынша жұмыстарды қарқынды жүргізу бойынша тапсырмалар берілді.

Стратегиялық сессияның қорытындылары мен тапсырмалары инвестициялық жобалардың Жол карталарын жаңарту кезінде, сондай‑ақ 2026 жылға арналған ҚМГ бюджетін жасау процесінде ескерілді.

Директорлар кеңесінің тұрақты даму мәселелеріне арналған отырысы

2025 жылғы 4 желтоқсанда ҚМГ Директорлар кеңесінің жоспарлы отырысы аясында тұрақты даму мәселелері қаралды, оның ішінде:

• ҚМГ‑дағы тұрақты даму жүйесі және төмен көміртекті даму бағдарламасын іске асырудың ағымдағы жай‑күйі;
• ҚМГ компаниялар тобы мен мердігер ұйымдарда өндірістік қауіпсіздік деңгейін арттыру, жарақат алуды алдын алу және оны азайту, сондай‑ақ ҚМГ‑ның корпоративтік талаптары мен стандарттарына сәйкестікті қамтамасыз ету мақсатында қабылданып жатқан шаралар.

Компанияның негізгі мәселелерінің іске асырылуын бақылау

ҚМГ‑ның стратегиялық бастамаларын бақылауды қамтамасыз ету, уақытылы түзету шараларын қабылдау, сондай‑ақ маңызды мәселелер бойынша ақпарат алу мақсатында 2025 жылы ҚМГ Директорлар кеңесі тұрақты түрде төменде көрсетілген есептер мен ақпараттарды тыңдап, қарады:

• ҚМГ Басқарма төрағасының Компания қызметіндегі негізгі өзгерістер туралы есептері;
• еңбек қауіпсіздігі және қоршаған ортаны қорғау мәселелері бойынша ақпарат;
• қаржы‑шаруашылық қызметінің алдын ала нәтижелері туралы есептер;
• ҚМГ Басқармасы шешім қабылдаған мүдделілік бар мәмілелер туралы есептер;
• Стратегияны, негізгі тиімділік көрсеткіштерін және инвестициялық жобаларды іске асыру мәртебесіне шолулар;
• ҚМГ‑ның шоғырландырылған даму жоспарын іске асыру туралы есеп;
• ҚМГ компаниялар тобының киберқауіпсіздігін қамтамасыз ету бойынша атқарылған жұмыстар туралы есептер;
• ҚМГ‑ның негізгі тәуекелдері мен қаржылық тәуекелдері бойынша есептер;
• ҚМГ Директорлар кеңесі комитеттері төрағаларының есептері;
• ҚМГ Директорлар кеңесінің тапсырмалары мен шешімдерінің орындалуы туралы есептер және Директорлар кеңесімен өзара іс‑қимыл тәртібі туралы ақпарат;
• ҚМГ Директорлар кеңесіне есеп беретін қызметтердің қызметі туралы есептер.

ҚМГ корпоративтік басқару саласындағы үздік тәжірибелерге сәйкес болуға ұмтылады және жоғары корпоративтік басқару стандарттары мен ашықтық Компанияның инвестициялық тартымдылығы мен экономикалық тиімділігін арттырудың маңызды факторлары екенін түсінеді. Бұл өз кезегінде әлеуетті инвесторлар, контрагенттер және өзге де стейкхолдерлердің сенімін нығайтуға, Компания ресурстарын тиімсіз пайдаланумен байланысты тәуекелдерді азайтуға, оның құнын арттыруға және жалпы әл‑ауқаттың өсуіне ықпал етеді. Осыған байланысты 2025 жылы ҚМГ Директорлар кеңесі Компаниядағы корпоративтік басқару тәжірибесінің тиімділігіне бақылау жүргізді.

Компания Жарғысына сәйкес, ҚМГ Директорлар кеңесі – ҚМГ акционерлерінің жалпы жиналысына есеп беретін басқару органы. Ол ҚМГ қызметіне жалпы басшылықты жүзеге асырады және алқалы атқарушы орган – ҚМГ Басқармасының қызметін бақылауды қамтамасыз етеді. Осылайша, Директорлар кеңесі мен ҚМГ Басқармасы арасындағы өзара іс‑қимылдың нақты белгіленген тәртібі және тұрақты түрде өткізілетін отырыстар арқылы ҚМГ Директорлар кеңесінің мүшелері Компанияның ірі акционерлерінің ұстанымы туралы уақтылы хабардар болып отырады.

Осылайша, 2025 жылы ҚМГ Директорлар кеңесі Компания қызметінің негізгі мәселелерін қарауға белсенді қатысты. Атап айтқанда, Компания үшін маңызды шешімдерді жедел қабылдау, сондай‑ақ ҚМГ менеджментіне Компанияда іске асырылып жатқан процестер мен жобалардың тиімділігін арттыруға бағытталған тапсырмалар мен ұсынымдар беру арқылы өз функцияларын жүзеге асырды.